Испаниялик машҳур футболчи Хуан Мата олис Австралияда ўз ўйинлари билан мухлисларни хушнуд этишда давом этмоқда.

Англиянинг «Манчестер Юнайтед» клуби собиқ аъзоси маҳаллий чемпионатда бир йўла иккита нуфузли индивидуал совринни қўлга киритди.

Биринчидан, Мата мавсум давомида 13 та голли узатмани амалга оширган ва ўз ҳисобига 5 та гол ёздириб қўйган ҳолда, Австралия чемпионатининг энг яхши ассистентига айланди.

Бироқ энг асосий янгилик бу эмас — тажрибали футболчи якунланган мавсумнинг энг яхши футболчиси деб топилди.

Эслатиб ўтамиз, Хуан Мата ҳозирда «Мельбурн Виктори» жамоаси шарафини ҳимоя қилмоқда. Бу унинг Австралиядаги иккинчи клубидир, чунки у бундан олдин бир муддат «Вестерн Сидней» таркибида ҳам тўп суришга улгурган эди.