Niderlandiya terma jamoasi bosh murabbiyi, «Barselona»ning sobiq o‘yinchisi va murabbiyi Ronald Kuman Robert Levandovskiga munosib o‘rinbosar topish haqida o‘z fikrlari bilan o‘rtoqlashdi.

Polshalik hujumchi mavsum yakunida erkin agent sifatida klubni tark etadi. 37 yoshli futbolchi allaqachon «Kamp Nou» muxlislari bilan xayrlashgan bo‘lib, bugungi «Valensiya»ga qarshi o‘yin uning «Barselona» libosidagi so‘nggi uchrashuvi bo‘ladi.

«Levandovski doim top-to‘purar bo‘lgan, har qanday top-klubga esa kuchli hujumchi kerak, shu bois «Barsa» yangi o‘yinchi izlashi shart. Ferran Torres yaxshi harakat qilmoqda, ammo hammasi jamoaga qanday uslubdagi forvard kerakligiga bog‘liq. Menimcha, ular bir mavsumda 20-25 ta gol ura oladigan futbolchini sotib olishlari kerak. O‘z gollari bilan jamoaga ochkolar olib keladigan hujumchi zarur», — deya Kumanning so‘zlaridan iqtibos keltiradi Barca Universal.

Eslatib o‘tamiz, mish-mishlarga ko‘ra, «Barselona» ayni paytda Xulian Alvares, Joao Pedro va Garri Keyn kabi hujumchilarning nomzodini ko‘rib chiqmoqda.