Нидерландия терма жамоаси бош мураббийи, «Барселона»нинг собиқ ўйинчиси ва мураббийи Рональд Куман Роберт Левандовскига муносиб ўринбосар топиш ҳақида ўз фикрлари билан ўртоқлашди.

Польшалик ҳужумчи мавсум якунида эркин агент сифатида клубни тарк этади. 37 ёшли футболчи аллақачон «Камп Ноу» мухлислари билан хайрлашган бўлиб, бугунги «Валенсия»га қарши ўйин унинг «Барселона» либосидаги сўнгги учрашуви бўлади.

«Левандовски доим топ-тўпурар бўлган, ҳар қандай топ-клубга эса кучли ҳужумчи керак, шу боис «Барса» янги ўйинчи излаши шарт. Ферран Торрес яхши ҳаракат қилмоқда, аммо ҳаммаси жамоага қандай услубдаги форвард кераклигига боғлиқ. Менимча, улар бир мавсумда 20-25 та гол ура оладиган футболчини сотиб олишлари керак. Ўз голлари билан жамоага очколар олиб келадиган ҳужумчи зарур», — дея Куманнинг сўзларидан иқтибос келтиради Barca Universal.

Эслатиб ўтамиз, миш-мишларга кўра, «Барселона» айни пайтда Хулиан Альварес, Жоао Педро ва Гарри Кейн каби ҳужумчиларнинг номзодини кўриб чиқмоқда.