«PSJ» himoyachisi Ashraf Hakimiyga nisbatan qo‘yilgan zo‘ravonlik ayblovlarini olib tashlash bo‘yicha Versal sudida eshituvlar bo‘lib o‘tdi. RCM Sport xabariga ko‘ra, futbolchining jamoadoshi Kilian Mbappe ushbu ish bo‘yicha o‘z ko‘rsatmalarini bergan.

Sud hujjatlarida keltirilishicha, Mbappe voqealar rivoji haqida Hakimiydan eshitgan ma’lumotlarni bayon qilgan.

«Ashraf menga ular qiz bilan yaqin munosabatda bo‘lganini, barchasi o‘zaro rozilik asosida kechganini aytdi. U menga o‘sha kungi yozishmalarni ham ko‘rsatdi – undan ko‘rinib turibdiki, qizning o‘zi Hakimiy bilan uchrashishni istagan. Men undan hech qanday majburlov bo‘lmagani haqida so‘radim, u esa qiz tomonidan hech qanday rad javobi yoki qarshilik bo‘lmaganini ta’kidladi», – deydi Mbappe polisiyaga bergan ko‘rsatmasida.

Eslatib o‘tamiz, 2023 yilda 24 yoshli qiz Ashraf Hakimiy unga nisbatan zo‘ravonlikka uringani haqida shikoyat qilgan edi. Qiz o‘sha kuni kechqurun taksida futbolchining uyiga borgani ma’lum qilingan. Hozirda tergov jarayoni davom etmoqda.