Madridning «Atletiko» klubi «Bryugge» hujumchisi Nikolo Tresoldiga jiddiy qiziqish bildirmoqda. Bu haqda jurnalist Patrik Berger xabar berdi.

Manbaga ko‘ra, belgiyaliklar klubi 21 yoshli nemis futbolchisini sotish orqali taxminan 30 million yevro ishlab olishni maqsad qilgan. Tresoldining o‘zi ham «Atletiko»ga o‘tish variantiga ijobiy qaramoqda.

Hujumchi joriy mavsumda barcha turnirlarda 57 ta uchrashuvda maydonga tushib, 20 ta gol va 8 ta golli uzatmaga mualliflik qildi. Uning «Bryugge» bilan amaldagi shartnomasi 2029 yil iyun oyi oxirigacha mo‘ljallangan. Transfermarkt portali futbolchining transfer qiymatini 13 million yevroga baholamoqda, biroq uning mavsumdagi barqaror o‘yini sabab «Bryugge» narxni ikki baravardan ko‘proqqa oshirmoqchi.