«Liverpul» markaziy himoyachisi Virjil van Deyk yakuniga yetgan Angliya chempionatida noyob natija qayd etdi. «Qizillar» sardori mavsumning barcha 38 ta o‘yinida to‘liq, ya’ni almashtirilmasdan harakat qildi.

Squawka ma’lumotlariga ko‘ra, niderlandiyalik futbolchi Premyer-liganing bir mavsumida birorta ham daqiqani o‘tkazib yubormagan eng yoshi katta futbolchiga (34 yoshu 320 kun) aylandi. U bu borada «Chelsi»ning sobiq himoyachisi va sardori Jon Terrining 2014/15 yilgi mavsumdagi rekordini yangiladi.

Virjil van Deyk nafaqat barqaror o‘yin namoyish etdi, balki hujumda ham faol bo‘ldi: u 6 ta gol bilan APL-2025/26 mavsumining himoyachilar o‘rtasidagi eng yaxshi to‘purariga aylandi. Arne Slot boshqaruvidagi jamoa chempionatni beshinchi o‘rinda yakunladi.