«Tottenxem» yarim himoyachisi Konor Gallaxer jamoaning yangi bosh murabbiyi Roberto de Dzerbi haqida ijobiy fikrlarni bildirdi. Avvalroq hujumchi Jeyms Meddison ham italiyalik mutaxassisning ishidan mamnunligini aytgan edi.
«U jamoaning butun dinamikasini, shu jumladan mening o‘yinimni ham tubdan o‘zgartirib yubordi. De Dzerbi kelganidan buyon o‘tgan bir necha o‘yinda men avvalgi butun faoliyatim davomida olmagan tajribani oldim. Biz unga darhol ishondik. U haqda faqat iliq so‘zlarni ayta olaman», — deya Gallaxerning so‘zlarini keltiradi Derbyderbyderby.it.
Eslatib o‘tamiz, italiyalik mutaxassis Roberto de Dzerbi mavsum o‘rtasida «Tottenxem»ni qabul qilib olib, jamoani Premyer-ligadan chiqib ketish xavfidan saqlab qoldi. «Shporlar» chempionat yakunida 17-o‘rinni egallab, ligada jon saqlab qolishga muvaffaq bo‘lishdi.
