O‘zbekiston milliy terma jamoasi safida hujumchi pozisiyasida to‘p surgan Ja’far Irismetov jamoaning Jahon chempionatidagi debyuti borasida o‘z fikrlari bilan o‘rtoqlashdi. Tarixiy debyut 18 iyun kuni Kolumbiyaga qarshi o‘yinda bo‘lib o‘tadi.

Turnirga yo‘llanma qo‘lga kiritilgach, o‘zbekistonliklar bosh murabbiy o‘zgarishini boshdan o‘tkazishdi. Timur Kapadze o‘rnini o‘z vaqtida dunyoning eng yaxshi himoyachilaridan biri sifatida tanilgan italiyalik mutaxassis Fabio Kannavaro egalladi.

«U yaxshi harakat qilayotgandek tuyulmoqda, ammo hozircha Kannavaroning o‘yini ko‘rinmayapti. Ko‘p natijalarga futbolchilarning individual mahorati evaziga erishyapmiz. Eng katta muammo esa himoyada», — deya Irismetovning so‘zlaridan iqtibos keltirmoqda «Metaratings.ru» nashri.

O‘zbekiston FIFA reytingida 50-o‘rinni egallab turibdi. Mundialning guruh bosqichida jamoa Kolumbiyadan (13-o‘rin) tashqari, Portugaliya (5-o‘rin) va DR Kongo (46-o‘rin) terma jamoalariga qarshi maydonga tushadi.