Angliyalik afsonaviy sobiq yarim himoyachi Stiven Djerrard joriy yilning yakunida kimni «Oltin to‘p» bilan ko‘rishni xohlashini aytdi.

«Liverpul»ning sobiq futbolchisi ayni damda «Bavariya»da to‘p tepayotgan vatandoshi Xarri Keynni afzal ko‘rmoqda.

«Umid qilamanki, bu yil Keyn «Oltin to‘p»ni qo‘lga kiritadi», — deya Djerrardning so‘zlarini keltiradi The Touchline.

32 yoshli hujumchi yakunlangan klub mavsumida «Bavariya» safida 51 ta uchrashuvda maydonga tushib, 61 ta gol va 7 ta golli uzatmani o‘z hisobiga yozdirib qo‘ydi. Myunxen grandi tarkibida angliyalik futbolchi Bundesliga va Germaniya Kubogi g‘olibiga aylandi, Chempionlar ligasida esa jamoa yarim finalgacha yetib bordi.