Meksika terma jamoasi bosh murabbiyi Xavyer Agirre 2026 yilgi Jahon chempionatining ochilish o‘yinida JAR ustidan qozonilgan g‘alabadan (2:0) so‘ng o‘z shogirdlarining o‘yinini tanqid qildi. 

"Menga o‘yinimiz yoqmadi. Albatta, Jahon chempionatini g‘alaba bilan boshlash yomon emas. Birinchi bo‘limda bizga yana bir gol yetishmadi, ayniqsa to‘p ustunga tekkan vaziyatdan keyin. Ikkinchi bo‘limda, ikkinchi goldan so‘ng xotirjamlikka berildik, keyin esa maydonga yangi futbolchilar tushgan bo‘lsa-da, boshqa gol ura olmadik”, — dedi Agirre TV Azteca efirida.

Murabbiy Jahon chempionatlaridagi ilk golini urgan hujumchi Raul Ximenes haqida alohida to‘xtalib o‘tdi. Forvard ushbu golini joriy yilda vafot etgan otasiga bag‘ishladi. “U yaxshi yigit va go‘yoki ikkinchi yoshligini boshdan kechirmoqda. Unda yangi kuchlar paydo bo‘ldi. U bu mening Jahon chempionatim bo‘ladi, deb aytyapti”, — deya ta’kidladi mutaxassis.