JCH-2026 o‘yinlariga tayyorgarlik ko‘rayotgan «Liverpul» himoyachisi Virjil van Deyk milliy terma jamoadagi faoliyatini yakunlashi mumkin. Bu haqda soccernet.nl portali Algemeen Dagblad nashriga tayanib xabar bermoqda. Uning so‘zlariga ko‘ra, terma jamoadagi faoliyatini tugatish haqidagi fikrlar Yevro-2024dan keyinoq paydo bo‘lgan.

«Oldingi Yevropa chempionatidan keyin davom etish-etmaslik borasida haqiqatdan ham ikkilangan edim. O‘shanda jamoa atrofidagi salbiy holatlardan juda charchagan edim. Shunchaki hammaga baqiraverish yaramaydi — bir-birini ijobiy rag‘batlantirish va jamoadagi har bir insonning rolini muhim deb bilish kerak», — dedi Niderlandiya terma jamoasi sardori intervyusida.

Van Deyk har qanday holatda ham klub darajasida o‘ynashda davom etishni rejalashtirmoqda. Biroq kelasi yozda uning «Liverpul»da qolish-qolmasligi noma’lum. Jamoaning yangi bosh murabbiyi Andoni Iraola boshqa sardor tayinlamoqchi, futbolchining o‘zi esa Turkiyaning «Galatasaroy» klubiga o‘tishi mumkinligi haqida faol mish-mishlar tarqalmoqda.