Golkiper Antonin Kinski yangi besh yillik shartnoma orqali o‘z kelajagini Londonning "Tottenxem" klubi bilan bog‘laydi. Bu haqda The Athletic nashri yozmoqda. Roberto de Dzerbi "shporlar" bosh murabbiyi etib tayinlanganidan so‘ng, Kinski klubning asosiy darvozaboniga aylandi.
Kichik Kinski — "Saturn" klubi sobiq darvozaboni Antonin Kinskining o‘g‘li hisoblanadi. Yosh posbon bundan bir yarim yil avval Praganing "Slaviya" klubidan transfer qilinib, London klubi a’zosiga aylangan edi. Yakunlangan mavsum doirasida u 10 ta uchrashuvda maydonga tushib, o‘z darvozasidan jami 12 ta gol o‘tkazib yubordi.
Eslatib o‘tamiz, bundan avvalroq "Tottenxem" darvoza chizig‘ini Angliya Premyer-ligasida "Nyukasl" sharafini bir necha yil davomida himoya qilgan tajribali darvozabon bilan kuchaytirib olgan edi.
