Angliya terma jamoasi himoyachisi Ris Jeyms son orqa mushagidagi jarohat tufayli Jahon chempionatining kamida ikkita uchrashuvida jamoasiga yordam bera olmaydi. Bu haqda Britaniyaning mashhur The Guardian nashri xabar tarqatdi.
«Chelsi» klubi sharafini himoya qiluvchi futbolchi seshanba kuni Bostonda Ganaga qarshi kechgan (0:0) bahsdan so‘ng mushaklarida noqulaylik his qilgan.
Jeyms juma kuni jamoasining Kanzas-Sitidagi mashg‘ulotlarida ishtirok etmadi. Angliyaliklar guruh bosqichining so‘nggi turida Panamaga qarshi o‘ynash uchun Nyu-Yorkka yo‘l olishgan.
Shifokorlar xulosasiga ko‘ra, himoyachi 3-tur doirasidagi Panamaga qarshi bahsni, shuningdek, Angliya terma jamoasining 1/16 final (pley-off) bosqichidagi ilk uchrashuvini aniq o‘tkazib yuboradi. Uning keyingi bahslarda maydonga tushishi tiklanish jarayoniga bog‘liq bo‘ladi.
