Англия терма жамоаси ҳимоячиси Рис Жеймс сон орқа мушагидаги жароҳат туфайли Жаҳон чемпионатининг камида иккита учрашувида жамоасига ёрдам бера олмайди. Бу ҳақда Британиянинг машҳур The Guardian нашри хабар тарқатди.
«Челси» клуби шарафини ҳимоя қилувчи футболчи сешанба куни Бостонда Ганага қарши кечган (0:0) баҳсдан сўнг мушакларида ноқулайлик ҳис қилган.
Жеймс жума куни жамоасининг Канзас-Ситидаги машғулотларида иштирок этмади. Англияликлар гуруҳ босқичининг сўнгги турида Панамага қарши ўйнаш учун Нью-Йоркка йўл олишган.
Шифокорлар хулосасига кўра, ҳимоячи 3-тур доирасидаги Панамага қарши баҳсни, шунингдек, Англия терма жамоасининг 1/16 финал (плей-офф) босқичидаги илк учрашувини аниқ ўтказиб юборади. Унинг кейинги баҳсларда майдонга тушиши тикланиш жараёнига боғлиқ бўлади.
