Senegal terma jamoasi darvozaboni Eduar Mendi milliy terma jamoa qarorgohini tark etdi va davolanish muolajalarini o‘tash uchun Saudiya Arabistoniga uchib ketdi. Bu haqda DSports nashri xabar tarqatmoqda.
Posbon Jahon chempionati — 2026 guruh bosqichi doirasidagi Norvegiyaga qarshi uchrashuvda (2:3) jarohat orttirib olgan edi. Futbolchi bahsning ikkinchi bo‘limida zaxiraga olingan. Mendining jarohati qanchalik jiddiy ekanligi hozircha ma’lum qilinmagan. Shuningdek, darvozabon Senegalning JCHdagi keyingi o‘yinlarida ishtirok eta oladimi yoki yo‘qmi — bunisi ham noma’lum bo‘lib turibdi.
Jahon chempionatining 1/16 finali doirasida Afrika vakillari Belgiya milliy terma jamoasiga qarshi maydonga tushishadi. Uchrashuv 1 iyul kuni bo‘lib o‘tadi va Toshkent vaqti bilan tungi soat 01:00 da boshlanadi.
