Germaniya terma jamoasi Jahon chempionatini tark etganidan so‘ng Joshua Kimmix o‘ziga xos «noyob» natija muallifiga aylangani ayon bo‘ldi. U «bundestim» safida 100 dan ortiq uchrashuvda maydonga tushib, jamoa bilan birga birorta ham yirik sovrinni (Jahon va Yevropa chempionatlari nazarda tutilmoqda) qo‘lga kirita olmadi.
Transfermarkt ma’lumotlariga ko‘ra, Kimmix Germaniya libosida 114 ta o‘yin o‘tkazgan. Uning xalqaro miqyosdagi eng yaxshi natijasi — Yevro-2016 musobaqasining yarim finali hisoblanadi. Nufuzi pastroq bo‘lgan turnirlardan esa uning hisobida Konfederasiyalar kubogi g‘olibligi mavjud. Taqqoslash uchun, terma jamoa safida o‘yinlar soni bo‘yicha rekordchi bo‘lgan Lotar Matteus (150 ta o‘yin) ham Jahon, ham Yevropa chempionligini qo‘lga kiritgan.
Miroslav Kloze (137 o‘yin), Lukas Podolski (130), Manuel Noyer (128 dan ortiq), Bastian Shvaynshtayger (121 o‘yin), Toni Kroos (114 o‘yin) va Filipp Lam (113 o‘yin) 2014 yilda Jahon chempioni bo‘lishgan.
Frans Bekkenbauer, Yurgen Klinsmann va Germaniya safida 100 dan ortiq bahsda qatnashgan yana bir qator futbolchilarning ham faoliyatida yirik turnirlardagi g‘alabalar mavjud.
