Германия терма жамоаси Жаҳон чемпионатини тарк этганидан сўнг Жошуа Киммих ўзига хос «ноёб» натижа муаллифига айлангани аён бўлди. У «бундестим» сафида 100 дан ортиқ учрашувда майдонга тушиб, жамоа билан бирга бирорта ҳам йирик совринни (Жаҳон ва Европа чемпионатлари назарда тутилмоқда) қўлга кирита олмади.

Transfermarkt маълумотларига кўра, Киммих Германия либосида 114 та ўйин ўтказган. Унинг халқаро миқёсдаги энг яхши натижаси — Евро-2016 мусобақасининг ярим финали ҳисобланади. Нуфузи пастроқ бўлган турнирлардан эса унинг ҳисобида Конфедерациялар кубоги ғолиблиги мавжуд. Таққослаш учун, терма жамоа сафида ўйинлар сони бўйича рекордчи бўлган Лотар Маттеус (150 та ўйин) ҳам Жаҳон, ҳам Европа чемпионлигини қўлга киритган.

Мирослав Клозе (137 ўйин), Лукас Подольски (130), Мануэль Нойер (128 дан ортиқ), Бастиан Швайнштайгер (121 ўйин), Тони Кроос (114 ўйин) ва Филипп Лам (113 ўйин) 2014 йилда Жаҳон чемпиони бўлишган.

Франц Беккенбауэр, Юрген Клинсманн ва Германия сафида 100 дан ортиқ баҳсда қатнашган яна бир қатор футболчиларнинг ҳам фаолиятида йирик турнирлардаги ғалабалар мавжуд.