Ispaniya terma jamoasi va «Atletiko» yarim himoyachisi Aleks Baena psixolog bilan ishlash uning faoliyatiga qanday ta’sir ko‘rsatgani haqida gapirib berdi.

Yaqindagina futbolchi Federiko Valverde bilan sodir bo‘lgan voqea uni hatto futboldan ketish haqida o‘ylashga majbur qilgani va bu juda og‘ir davr bo‘lganini esladi:

«Ha, chunki bu mening La Ligadagi birinchi mavsumim edi. TelevideniYE, matbuot va radioda qilayotgan har bir ishingizni tanqid qilishlarini kuzatish, oilangizga tahdidli xabarlar yuborishlari, ertalabdan qo‘ng‘iroq qilib, o‘lim bilan qo‘rqitishlari... Men ular uchun o‘zimdan ko‘ra ko‘proq qayg‘urdim.

Men intervyular va televideniye dunyosiga ozgina bo‘lsa-da ko‘nikkan edim, lekin yaqinlarimning har kuni o‘lim tahdidlari va haqoratli xabarlar olayotganini ko‘rish chidab bo‘lmas edi».

Baena bunday murakkab vaziyatdan qanday chiqib ketganini quyidagicha tushuntirdi:

«Oilam va do‘stlarimning mehri, eng muhimi, psixologimning yordami tufayli. Biz juda ko‘p ishladik, u meni qiyin vaziyatda tashlab qo‘ymadi va hammasi iziga tushib ketishi uchun bor kuchimizni ishga soldik.

Men buni doim aytaman. Menda diyetolog, fitnes-murabbiy va fizioterapevtdan iborat ajoyib ishchi jamoa bor, ular men uchun xuddi oilamdek bo‘lib qolishgan. Ammo shuni aniq ayta olamanki, agar psixologim bo‘lmaganida, men hozir bu yerda jahon chempionatida bo‘lmasdim».