Argentina futboli afsonasi Lionel Messi Jahon chempionatlari tarixidagi golli uzatmalar soni bo‘yicha o‘zining hamyurti Diyego Maradonadan o‘zib ketgandek tuyulgan edi. Kabo-Verde terma jamoasiga qarshi kechgan va argentinaliklarning 3:2 hisobidagi g‘alabasi bilan yakunlangan bahsning hqo‘shimcha bo‘limlarida Messi assistni o‘z hisobiga yozdirib qo‘ygandi. Biroq keyinchalik FIFA Kristian Romero tomonidan kiritilgan golni Kabo-Verde himoyachisi Dineyning avtogoli sifatida rasmiylashtirdi.
Shu tariqa, Messining mundiallardagi golli uzatmalari soni 8 taligicha qoldi — Diyego Maradonada ham aynan shuncha assist mavjud.
Eslatib o‘tamiz, Jahon chempionatining 1/8 finalida Argentina Misr terma jamoasiga qarshi maydonga tushadi. Agar Leo ushbu uchrashuvda bitta golli uzatma amalga oshira olsa, JCH tarixida bu ko‘rsatkich bo‘yicha yakka peshqadamga aylanib oladi.
