Kabo-Verde terma jamoasi darvozaboni Vozinya ijtimoiy tarmoqlarda 22 millionga yaqin (ayni paytda 21.2 mln dan ziyod) obunachi to‘plashga muvaffaq bo‘ldi.

Portugaliyaning «Shavesh» klubida to‘p suruvchi 40 yoshli posbon Argentinaga qarshi kechgan dramatik bahsdan so‘ng Jahon chempionatidagi ishtirokini yakunladi. Biroq uning ijtimoiy tarmoqlardagi mashhurligi kundan-kunga o‘sib bormoqda. E’tiborli jihati, Jahon chempionatidagi ilk bahs start olguniga qadar Vozinyaning sahifasini atigi 56 000 inson kuzatar edi.

Bunday keskin o‘sishga futbolchining Ispaniyaga qarshi (0:0) o‘yindagi super qahramonligi hamda Braziliyaning mashhur CazéTV loyihasi va mahalliy OAV tomonidan boshlangan yirik qo‘llab-quvvatlash kampaniyasi sabab bo‘ldi. Natijada, aholisi bor-yo‘g‘i 530 ming kishidan iborat bo‘lgan kichik orol davlati darvozaboni internet olamining haqiqiy «bosh qahramoni»ga aylandi.