Madridning «Real» klubi Ispaniya chempionati yangi — 2026/2027 yilgi mavsumining «Real Sosyedad»ga qarshi kechadigan debyut uchrashuvi boshqa muddatga ko‘chiriladi.

Bunday qaror «Qirollik klubi» futbolchilarining JCH-2026ning so‘nggi hal qiluvchi bosqichlarida ishtirok etayotgani sababli qabul qilindi. Primeraning start turidan o‘rin olgan yana bir qator uchrashuvlar ham rejalashtirilgan muddatdan taxminan 10 kun kechroq o‘tkaziladi. Bunga Ispaniya futbolchilar kasaba uyushmasi (AFE) talabi sabab bo‘ldi. Uyushma jahon birinchiligi yakunlanganidan keyin o‘yinchilarga majburiy uch haftalik ta’til va uch haftalik tayyorgarlik jarayoni taqdim etilishini talab qilib turib oldi.

Madridliklar taqvimdagi o‘zgarishlar ta’sir qilgan ilk jamoaga aylanishdi, chunki ular marokashlik Braim Dias yoki fransiyalik uchlik — Kilian Mbappe, Orelyen Tchuameni va Ibraima Konate timsolida turnirning kamida bitta yarim finalchisiga ega bo‘lishlari kafolatlangan.

La Liga prezidenti Xavyer Tebas o‘yinlar ko‘chirilishini tasdiqladi.

«Barcha futbolchilar Jahon chempionatidagi so‘nggi o‘yinlaridan boshlab hisoblaganda uch haftalik ta’til va yana uch haftalik tayyorgarlik vaqtiga ega bo‘lishadi. Biz 1-turni bo‘lib yuborishimiz mumkin: oltita o‘yinni 14 avgustga qadar o‘tkazamiz, qolgan uch-to‘rtta uchrashuvni esa avgust oyi oxirida, hafta o‘rtasiga ko‘chiramiz», — deya Tebasning so‘zlarini keltiradi The Athletic.

Ushbu qaror sababli, Joze Mourinyo «qaymoqranglilar» bosh murabbiyligi lavozimiga qaytganidan keyingi ilk rasmiy uchrashuv 23 avgust kuni, 2-tur doirasida «Espanyol»ga qarshi safardagi o‘yinga to‘g‘ri keladi.