Ispaniya terma jamoasi sardori Rodri Jahon chempionati finalida Argentinaga qarshi o‘yin oldidan o‘z ishonchini saqlab qolmoqda. Marca xabariga ko‘ra, yarim himoyachi butun turnir davomida jamoadoshlariga bir xil gapni takrorlamoqda: «Men bu yerga Jahon chempionatida g‘olib chiqish uchun kelganman».

Fransiya ustidan qozonilgan 2:0 hisobidagi g‘alabadan so‘ng, ispanlar o‘z tarixidagi ikkinchi Jahon chempionati finaliga chiqishdi va endi ikkinchi titulni qo‘lga kiritishga bir qadam qoldi.

Turnirning eng muhim o‘yini yaqinlashib kelayotganiga qaramay, terma jamoa ichida xotirjamlik hukm surmoqda. Futbolchilar oldilariga qo‘yilgan vazifani hali to‘liq bajarmaganliklarini ta’kidlab, bor e’tiborlarini Argentinaga qarshi bo‘lajak uchrashuvga qaratganlar.

Rodrining o‘zi avvalroq chempionlikka eltuvchi yo‘l oson bo‘lmasligini qayd etgandi:

«Agar kimdir biz Jahon chempionatida azob chekmasdan g‘olib chiqamiz deb o‘ylasa, u adashadi. Bu yerda dunyoning eng yaxshi terma jamoalari yig‘ilgan, ammo jamoamiz bunday turnirda g‘alaba qozonish uchun kerakli barkamollikni ko‘rsatdi».

Ispaniya va Argentina o‘rtasidagi Jahon chempionati finali 19 iyul kuni Ist-Raterforddagi «Metlayf» stadionida bo‘lib o‘tadi.