Bangladeshda Jahon chempionati bilan bevosita yoki bilvosita bog‘liq bo‘lgan kamida 12 ta o‘lim holati qayd etildi.

38 yoshli Md Shariful Islam Argentina – Misr uchrashuvi vaqtida boshqa muxlislar bilan yuzaga kelgan janjaldan so‘ng vafot etdi. Veloriksha haydovchisi bo‘lgan Islam o‘yinni choyxonada tomosha qilayotgan vaqtda Lionel Messining penaltidan foydalana olmagani ustidan kulgani uchun "Argentina muxlislari" tomonidan hujumga uchradi. Islam Braziliya terma jamoasining ashaddiy muxlisi edi.

"Futbol uchun odamni qanday o‘ldirish mumkin? Mening ikkita qizim bor. Endi ular kimni ota deb chaqirishadi? Qizlarim yetim qoldi. Men erimning qotili eng og‘ir jazoga tortilishini istayman", – dedi uning rafiqasi Byuti Begum.

Mamlakatning turli hududlarida odamlar kaltaklanish, sovuq qurol bilan qilingan hujumlar, elektr toki urishi va yo‘l-transport hodisalari oqibatida hayotdan ko‘z yumdi.

OAV xabarlariga ko‘ra, Fayaz Tadjrian Argentina – Misr o‘yinini tomosha qilishga ketayotib, motosikl avariyasi oqibatida halok bo‘lgan. Mustafa Kazi esa futbol borasidagi bahs vaqtida sovuq qurol bilan chopib tashlangan. Maxidul Islam esa g‘alabani nishonlash vaqtida ustiga futbol darvozasi qulab tushishi natijasida vafot etgan. Xabiganj shahrida Braziliya va Argentina muxlislari o‘rtasidagi mahalliy futbol o‘yinidan keyin yuz bergan to‘qnashuvlarda o‘nlab odamlar jarohat oldi.

Bir tadqiqotga ko‘ra, 2022 yilgi Jahon chempionati vaqtida Bangladeshda muxlislar guruhlari o‘rtasidagi to‘qnashuvlar natijasida 23 kishi halok bo‘lgan edi.