O‘zbekiston futbol hakamlari markazi huzuridagi Ekspert hakamlar guruhi Superliganing 12-turidan o‘rin olgan «Neftchi» – «Buxoro» hamda «Bunyodkor» – «Nasaf» uchrashuvlarida muhokamalarga sabab bo‘lgan epizodlar yuzasidan xulosasini e’lon qildi.

«Neftchi» – «Buxoro» uchrashuvining 7-daqiqasida «Buxoro» hujumchisining zarbasidan keyin to‘p «Neftchi» futbolchisining yuqoriga ko‘tarilgan va notabiiy holatdagi qo‘liga tekkan. Ekspertlar bosh hakam tomonidan penalti belgilanishi to‘g‘ri qaror bo‘lganini qayd etdi.

21-daqiqada esa «Buxoro» futbolchisining «Neftchi»ning 7-raqamli o‘yinchisiga yengil teginishi oddiy futbol kontakti sifatida baholangan. Shu bois ushbu vaziyatda penalti belgilanmasligi to‘g‘ri qaror deb topildi.

51-daqiqada to‘p avval «Buxoro» futbolchisining oyog‘iga tegib, yo‘nalishini o‘zgartirganidan keyin qo‘liga tekkani uchun qo‘l bilan o‘yin qayd etilmagani ham to‘g‘ri deb baholandi.

73-daqiqada «Buxoro» himoyachisi avval to‘pga o‘ynagani, keyin esa harakat davomida raqibining oyog‘ini bosib yuborgani muqarrar to‘qnashuv sifatida e’tirof etildi. Shuning uchun qoidabuzarlik belgilanmagani to‘g‘ri qaror bo‘lgan.

90+1-daqiqada esa «Buxoro»ning 6-raqamli futbolchisi raqibini ortidan turtib yiqitgan. Ekspertlar mazkur epizodda hakam tomonidan jarima zarbasi belgilanishini to‘g‘ri qaror sifatida baholadi. Shu bilan birga, «Buxoro»ning 4-raqamli futbolchisi harakatlarida qo‘pollik yoki agressiv xatti-harakat kuzatilmagani ta’kidlandi.

Shuningdek, «Bunyodkor» – «Nasaf» uchrashuvining 52-daqiqasida «Nasaf»ning 20-raqamli futbolchisi ehtiyotsizlik oqibatida raqibining yuziga qo‘li bilan zarba bergan epizod ham ko‘rib chiqildi.

Ekspertlar bosh hakam ushbu vaziyatni dastlab e’tiborsiz qoldirgani bois VAR aralashuvi to‘g‘ri bo‘lganini qayd etdi. Video takrordan keyin futbolchiga sariq kartochka ko‘rsatilishi esa to‘g‘ri intizomiy chora sifatida baholandi.