Futbol bo‘yicha O‘zbekiston Superligasining 13-turidan o‘rin olgan navbatdagi uchta uchrashuv o‘z yakuniga yetdi. Unda Olmaliqning “OKMK” jamoasi safarda “Qo‘qon-1912” jamoasiga hech qanday imkoniyat qoldirmagan bo‘lsa, “Lokomotiv” — “Andijon” hamda “Mash’al” — “Nasaf” qarama-qarshiliklarida durang qayd etildi.

“Lokomotiv” — “Andijon”

Toshkentdagi “Lokomotiv” stadionida kechgan uchrashuv gollarga va dramatik burilishlarga boy bo‘ldi. Birinchi bo‘lim tanaffusiga qarab ketayotgan bir pallada mezbonlar hisobni ochishga muvaffaq bo‘ldi. 43-daqiqada Abdulloh Yo‘ldoshev “temir yo‘lchilar”ni oldinga olib chiqdi — 1:0.

Ikkinchi taymning 53-daqiqasida Sardor Mirzayev oradagi farqni oshirdi. Biroq mehmonlar qisqa vaqt ichida muvozanatni tiklashga erishdi: 68-daqiqada Alexandre Androkinashvili hamda 72-daqiqada Dragan Cheran to‘p kiritib, hisobni 2:2 ko‘rinishiga keltirdi. Uchrashuvning 79-daqiqasida Nikolay Ivanov tomonidan urilgan gol “Lokomotiv”ni ikkinchi marta hisobda oldinga olib chiqqan edi. Ammo o‘yin yakunlanishi arafasida, ya’ni 89-daqiqada Hamidullo Karimov muvozanatni tiklab, andijonliklarni mag‘lubiyatdan qutqarib qoldi — 3:3.

O‘zbekiston Superligasi, 13-tur

“Lokomotiv” — “Andijon” 3:3
Gollar: 1:0 — Abdulloh Yo‘ldoshev (43), 2:0 — Sardor Mirzayev (53), 2:1 — Alexandre Androkinashvili (68), 2:2 — Dragan Cheran (72), 3:2 — Nikolay Ivanov (79), 3:3 — Hamidullo Karimov (89)

“Mash’al” — “Nasaf”

Turning yana bir uchrashuvi Qarshidagi “Markaziy” stadionida bo‘lib o‘tdi. Unda nominal mezbon “Mash’al” “Nasaf”ga qarshi maydonga tushdi.

O‘yin muborakliklarning tezkor goli bilan boshlandi. 18-daqiqada Straxinya Boshnyak “Mash’al”ni hisobda oldinga olib chiqdi. Birinchi bo‘lim yakunlanishi arafasida, ya’ni 39-daqiqada Sardorbek Bahromov javob golini urib, muvozanatni tikladi.

Ikkinchi bo‘limda har ikki jamoaning urinishlariga qaramay, darvozalarga boshqa to‘p kiritilmadi va uchrashuv 1:1 hisobidagi durang bilan yakunlandi.

O‘zbekiston Superligasi, 13-tur

“Mash’al” — “Nasaf” 1:1
Gollar: 1:0 — Straxinya Boshnyak (18), 1:1 — Sardorbek Bahromov (39)

“Qo‘qon-1912” — “OKMK”

Turning eng sermahsul uchrashuvlaridan biri Qo‘qondagi “Markaziy” stadionida bo‘lib o‘tdi. Unda “Qo‘qon-1912” jamoasi Olmaliqning “OKMK” klubini qabul qilib, yirik hisobda imkoniyatni boy berdi.

Birinchi bo‘limda har ikki jamoa ehtiyotkorona harakat qildi va tanaffusga qadar darvozalar ishg‘ol qilinmadi. Biroq ikkinchi taymda mehmonlar ketma-ket gollar urib, o‘yin taqdirini hal qildi. Dastlab 47 va 59-daqiqalarda Asadbek Sobirjonov dubl qayd etgan bo‘lsa, 55-daqiqada Nodirbek Abdurazzoqov ham o‘z nomini tabloga yozdirib qo‘ydi — 0:3.

66-daqiqada Ibrohim Yo‘ldoshev qo‘qonliklarning yagona javob goliga mualliflik qildi. 74-daqiqada esa Siavash Haqnazari olmaliqliklarning to‘rtinchi golini urib, uchrashuvga yakuniy nuqtani qo‘ydi — 1:4. Shu tariqa “OKMK” safardan yirik g‘alaba bilan qaytdi.

O‘zbekiston Superligasi, 13-tur

“Qo‘qon-1912” — “OKMK” 1:4
Gollar: 0:1 — Asadbek Sobirjonov (47), 0:2 — Nodirbek Abdurazzoqov (55), 0:3 — Asadbek Sobirjonov (59), 1:3 — Ibrohim Yo‘ldoshev (66), 1:4 — Siavash Haqnazariy (74)