Ukraina terma jamoasi va Lissabonning «Benfika» klubi darvozaboni Anatoliy Trubin jamoaning darvozabonlar chizig‘ini kuchaytirishni rejalashtirayotgan Turinning «Yuventus» klubi manfaatlari doirasida bo‘lib turibdi.
Insayder Nikolo Skira ijtimoiy tarmoqlarda xabar berishicha, «keksa senyora» ukrainalik posbon bo‘yicha ma’lumot so‘ragan. Shuningdek, Italiya top-klubining e’tibor markazida Dzion Sudzuki («Parma») va Emiliano Martines («Aston Villa») ham bor. Argentinalik posbon «Yuventus»ning darvozabon pozisiyasi uchun asosiy nishoni deb hisoblanmoqda.
Trubin 2023 yilning yozidan beri «Benfika»da o‘ynab kelmoqda, uning amaldagi shartnomasi 2028 yilning o‘rtalarigacha mo‘ljallangan. Anatoliyning bozor qiymati 25 million yevroni tashkil etadi.
