Superliganing 15-turidan o‘rin olgan «Qizilqum» — «Bunyodkor» uchrashuvi belgilangan muddatda o‘tkazilmaydi. Bu haqda «Bunyodkor» klubi Professional futbol ligasiga rasman ma’lum qildi.

Klubning ma’lum qilishicha, og‘ir moliyaviy holat tufayli jamoa Navoiyga safar qila olmaydi. Xususan, yo‘l chiptalari, mehmonxona xarajatlari hamda delegasiya a’zolarining ovqatlanishi uchun zarur mablag‘ mavjud emas.

Avvalroq «Bunyodkor» bosh murabbiyi va qator futbolchilar jamoa a’zolari bir necha oydan buyon maosh olmayotgani, shuningdek, klub bazasida ham qator muammolar mavjudligini ma’lum qilgan edi.

Superliga reglamentiga muvofiq, 15-tur doirasida o‘tkazilishi rejalashtirilgan «Qizilqum» — «Bunyodkor» uchrashuvi uchun mehmon jamoaga texnik mag‘lubiyat yoziladi.

Shuningdek, agar mavsum davomida bunday holat yana bir bor takrorlansa, «Bunyodkor»ni Superliga musobaqasidan chetlatish masalasi Liga Ijroiya qo‘mitasi kun tartibiga kiritiladi.

O‘z navbatida, Professional futbol ligasi mazkur uchrashuvni tashkil etish bilan bog‘liq barcha tashkiliy ishlar to‘xtatilganini ma’lum qildi.