Суперлиганинг 15-туридан ўрин олган «Қизилқум» — «Бунёдкор» учрашуви белгиланган муддатда ўтказилмайди. Бу ҳақда «Бунёдкор» клуби Профессионал футбол лигасига расман маълум қилди.

Клубнинг маълум қилишича, оғир молиявий ҳолат туфайли жамоа Навоийга сафар қила олмайди. Хусусан, йўл чипталари, меҳмонхона харажатлари ҳамда делегация аъзоларининг овқатланиши учун зарур маблағ мавжуд эмас.

Аввалроқ «Бунёдкор» бош мураббийи ва қатор футболчилар жамоа аъзолари бир неча ойдан буён маош олмаётгани, шунингдек, клуб базасида ҳам қатор муаммолар мавжудлигини маълум қилган эди.

Суперлига регламентига мувофиқ, 15-тур доирасида ўтказилиши режалаштирилган «Қизилқум» — «Бунёдкор» учрашуви учун меҳмон жамоага техник мағлубият ёзилади.

Шунингдек, агар мавсум давомида бундай ҳолат яна бир бор такрорланса, «Бунёдкор»ни Суперлига мусобақасидан четлатиш масаласи Лига Ижроия қўмитаси кун тартибига киритилади.

Ўз навбатида, Профессионал футбол лигаси мазкур учрашувни ташкил этиш билан боғлиқ барча ташкилий ишлар тўхтатилганини маълум қилди.