Kabo-Verde terma jamoasi darvozaboni Vozinyaning Chilining «Kolo-Kolo» klubiga o‘tishi hujjatlarni rasmiylashtirishdagi muammolar tufayli hozircha kechikmoqda. Bu haqda AS nashri xabar berdi.

Dastlab darvozabon payshanba kuni Chiliga yetib kelishi kerak edi. Biroq u reysga chiqmagani ortidan transfer barbod bo‘lishi mumkinligi haqida mish-mishlar tarqaldi.

Futbolchining atrofidagilar esa muzokaralarda hech qanday muammo yo‘qligini ta’kidlab, transfer o‘z kuchida qolayotganini ma’lum qildi.

Ularning so‘zlariga ko‘ra, kechikishga faqat byurokratik jarayonlar sabab bo‘lgan. Gap shundaki, Kabo-Verdeda Chili konsulligi mavjud emas. Shu bois hujjatlar Portugaliya orqali rasmiylashtirilmoqda. Biroq Vozinya Portugaliya fuqarosi emasligi sababli jarayon kutilganidan ko‘ra ko‘proq vaqt olmoqda.

Manba ma’lumotiga ko‘ra, hujjatlar bilan bog‘liq masala yaqin kunlarda hal etilishi kutilmoqda. Shundan so‘ng darvozabon Chiliga yo‘l oladi. Futbolchi vakillari uning juma kuni yoki yakshanba kuni uchib ketishiga umid qilmoqda.