Кабо-Верде терма жамоаси дарвозабони Возиньянинг Чилининг «Коло-Коло» клубига ўтиши ҳужжатларни расмийлаштиришдаги муаммолар туфайли ҳозирча кечикмоқда. Бу ҳақда AS нашри хабар берди.
Дастлаб дарвозабон пайшанба куни Чилига етиб келиши керак эди. Бироқ у рейсга чиқмагани ортидан трансфер барбод бўлиши мумкинлиги ҳақида миш-мишлар тарқалди.
Футболчининг атрофидагилар эса музокараларда ҳеч қандай муаммо йўқлигини таъкидлаб, трансфер ўз кучида қолаётганини маълум қилди.
Уларнинг сўзларига кўра, кечикишга фақат бюрократик жараёнлар сабаб бўлган. Гап шундаки, Кабо-Вердеда Чили консуллиги мавжуд эмас. Шу боис ҳужжатлар Португалия орқали расмийлаштирилмоқда. Бироқ Возинья Португалия фуқароси эмаслиги сабабли жараён кутилганидан кўра кўпроқ вақт олмоқда.
Манба маълумотига кўра, ҳужжатлар билан боғлиқ масала яқин кунларда ҳал этилиши кутилмоқда. Шундан сўнг дарвозабон Чилига йўл олади. Футболчи вакиллари унинг жума куни ёки якшанба куни учиб кетишига умид қилмоқда.
