Fransiya terma jamoasi tarkibida Jahon chempioni, «Chelsi»ning sobiq o‘yinchisi Frank Lebyof «ko‘klar»ning yangi futbolchilari haqidagi fikrlari bilan o‘rtoqlashdi va londonliklarga hamon Robert Sanchesning o‘rniga yangi darvozabon zarurligini ta’kidladi.

Sanchesdan tashqari, «Chelsi» darvozasidan Filip Yorgensen, Mayk Penders, Teddi Sharman-Lou va Gebriyel Slonina o‘rin olishi mumkin.

«Men o‘zimni xotirjamroq his qilyapman, chunki «Chelsi»da oxir-oqibat tajribali o‘yinchilar kerakligini tushunib yetishdi. Xenderson va Denni Uelbek kelishmoqda.

shuningdek, endilikda terma jamoada o‘ynash tajribasiga ega bo‘lgan Lakrua ham kelmoqda. Yosh futbolchilar atrofida ularga to‘g‘ri yo‘lni ko‘rsata oladigan o‘yinchilar borligi yaxshi deb o‘ylayman. Birinchi navbatda — kiyinish xonasida: o‘z xulq-atvori, mashg‘ulotlardagi mehnatga bo‘lgan munosabati, shuningdek, o‘yinlar paytidagi qiyin vaziyatlarni yengib o‘tish mahorati bilan. Shu sababli buni juda yaxshi qaror deb hisoblayman.

Menda hamon darvozabon bo‘yicha savollar bor. Sanches darvoza chizig‘ida juda yaxshi o‘ynashi mumkin, ammo oyoqda o‘ynashda u doimo muammolar tug‘diradi va to‘p unda bo‘lganida muxlislariga qo‘rquv soladi.

Fikrimcha, ularda 45 ga yaqin futbolchi bor. Ba’zilaridan xalos bo‘lishga to‘g‘ri keladi. Albatta, Xabi Alonso tarkibni aniqlab olishi va, ehtimol, kamida 15 ta o‘yinchi bilan xayrlashishi kerak bo‘ladi. Bu aqlsizlik, ammo u buni qilishga majbur. Aks holda normal ishlash va hammani jarayonga jalb qilishning imkoni yo‘q.

Oson bo‘lmaydi. U o‘ziga kerak bo‘lmagan o‘yinchilardan xalos bo‘lishiga to‘g‘ri keladi, chunki aks holda ular kiyinish xonasi ichida muammolarni keltirib chiqarishadi», — dedi Lebyof ESPNga.