Argentina milliy terma jamoasi sardori Lionel Messi hamda Portugaliya terma jamoasi sardori Krishtianu Ronalduga Jahon chempionati vaqtida suiqasd uyushtirish rejalashtirilgan. Bu haqda Marca nashri xabar berdi.

Hisobotga ko‘ra, Messi 2026 yilgi mundial davomida boshqa futbolchilarga qaraganda ko‘proq tahdidlar nishoniga aylangan.

Argentina va Iordaniya o‘rtasidagi guruh bosqichi uchrashuvi oldidan bir shaxs Dallas aeroportiga qo‘ng‘iroq qilib, stadionga yana ikki kishi bilan birga kirib borishini bildirgan. U o‘zida qo‘lbola portlovchi qurilmalar va AR-15 rusumidagi miltiq borligini aytgan. Mazkur tahdidda Messi alohida nishon sifatida tilga olingan.

Argentina va Misr o‘rtasidagi nimchorak final uchrashuvi oldidan esa ijtimoiy tarmoqda Messi haqidagi yana bir tahdid aniqlangan. Gumondorlardan biri stadionga kirib, argentinalik futbolchini portlatish niyatida ekanini yozgan.

Mazkur uchrashuv vaqtida stadion hududida portlovchi qurilmalar borligi haqida ham xabar kelib tushgan. Huquq-tartibot idoralari stadionni maxsus xizmat itlari yordamida sinchiklab tekshirgan. Biroq qidiruv ishlari natijasida hech qanday bomba topilmagan va xabar yolg‘on ekanligi aniqlangan.

Ronaldu ham tahdidlar nishonida bo‘lgan
Hisobotda Krishtianu Ronaldu bilan bog‘liq xavfsizlik holatlari ham qayd etilgan. FIFA xodimi futbolchining qayerda istiqomat qilayotgani haqida ma’lumot olishga urinayotgan shubhali shaxs haqida Federal qidiruv byurosiga (FBI) xabar bergan. Keyinchalik Xyuston polisiyasi ushbu shaxsni Portugaliya terma jamoasi joylashgan mehmonxonada qo‘lga olingan.

Toronto shahrida esa yana bir kishi Ronaldu bilan bir liftga kirishga uringani uchun hibsga olingan. U futbolchi bilan shunchaki suratga tushmoqchi bo‘lganini bildirgan.f