Аргентина миллий терма жамоаси сардори Лионель Месси ҳамда Португалия терма жамоаси сардори Криштиану Роналдуга Жаҳон чемпионати вақтида суиқасд уюштириш режалаштирилган. Бу ҳақда Marca нашри хабар берди.
Ҳисоботга кўра, Месси 2026 йилги мундиал давомида бошқа футболчиларга қараганда кўпроқ таҳдидлар нишонига айланган.
Аргентина ва Иордания ўртасидаги гуруҳ босқичи учрашуви олдидан бир шахс Даллас аэропортига қўнғироқ қилиб, стадионга яна икки киши билан бирга кириб боришини билдирган. У ўзида қўлбола портловчи қурилмалар ва АР-15 русумидаги милтиқ борлигини айтган. Мазкур таҳдидда Месси алоҳида нишон сифатида тилга олинган.
Аргентина ва Миср ўртасидаги нимчорак финал учрашуви олдидан эса ижтимоий тармоқда Месси ҳақидаги яна бир таҳдид аниқланган. Гумондорлардан бири стадионга кириб, аргентиналик футболчини портлатиш ниятида эканини ёзган.
Мазкур учрашув вақтида стадион ҳудудида портловчи қурилмалар борлиги ҳақида ҳам хабар келиб тушган. Ҳуқуқ-тартибот идоралари стадионни махсус хизмат итлари ёрдамида синчиклаб текширган. Бироқ қидирув ишлари натижасида ҳеч қандай бомба топилмаган ва хабар ёлғон эканлиги аниқланган.
Роналду ҳам таҳдидлар нишонида бўлган
Ҳисоботда Криштиану Роналду билан боғлиқ хавфсизлик ҳолатлари ҳам қайд этилган. FIFA ходими футболчининг қаерда истиқомат қилаётгани ҳақида маълумот олишга уринаётган шубҳали шахс ҳақида Федерал қидирув бюросига (ФБИ) хабар берган. Кейинчалик Хюстон полицияси ушбу шахсни Португалия терма жамоаси жойлашган меҳмонхонада қўлга олинган.
Торонто шаҳрида эса яна бир киши Роналду билан бир лифтга киришга урингани учун ҳибсга олинган. У футболчи билан шунчаки суратга тушмоқчи бўлганини билдирган.ф
