«Liverpul»ning sobiq himoyachisi Jeymi Karrager jamoaning yarim himoya chizig‘i borasida xavotirlarini bildirdi.

«Men uchun yarim himoya hamon «Liverpul»ning eng katta muammosi bo‘lib qolmoqda. Men barcha mavsumoldi o‘yinlarini tomosha qilmadim, ammo so‘nggi ikkita jiddiy raqib — «Lids» va «Monako»ga qarshi bahslarni ko‘rdim.

«Liverpul»ning o‘tgan mavsumdagi muammosi shunda ediki, yarim himoyada hamma joyda bo‘sh hududlar bor edi. Va bu muammo hech qayerga yo‘qolgani yo‘q. Buning ustiga, Dominik Soboslaidan yarim himoyada foydalanish orqali bu holat yanada jiddiylashadi. Menimcha, undan o‘nginchi raqam sifatida emas, balki aynan Rayan Gravenberx yonida markaziy yarim himoyachi sifatida foydalanishmoqchi, bu esa maydonni to‘liq qamrab oluvchi o‘yinga aylanadi.

Men bu yarim himoya triosiga qarab xavotirga tushyapman. Agar «Liverpul»ning olti yoki yettita futbolchisini sanab o‘tsangiz, ularni top-o‘yinchi emas deb bo‘lmaydi. Gravenberx, Virts yoki Soboslaini yomon o‘yinchi deb aytolmaysiz.

Ammo bu uchlikka qaraganimda: «Yo‘q, bu yerda sifatli futbolchilar juda ko‘p, lekin ularning barchasi hujum qilishga va oldinga yugurishga intiladi», deb o‘ylab qolaman. Hatto mavsumoldi o‘yinlarida ham maydon markazida «teshiklar» paydo bo‘lmoqda.

Men ushbu yarim himoya triosi Aleksis Makallister, Dominik Soboslai va Rayan Gravenberx — har biri alohida olganda juda yaxshi o‘yinchi bo‘lishiga qaramay — «Liverpul»ni chempionlik uchun kurashchilar qatoriga qaytara olishini tasavvur qilolmayapman. Men bunga aslo amin emasman», — dedi Karrager The Overlap Fan Debate ko‘rsatuvida.