"Barselona" hujumchisi Hamza Abdelkarim bosh murabbiy Hans-Diter Flik bilan ishlash haqida fikr bildirdi.
18 yoshli futbolchi chorshanba kuni o‘zi uchun qadrdon bo‘lgan Qohiraning "Al-Ahli" klubi darvozasini ishg‘ol qildi. Abdulkarim Yevropa sari yo‘l olguniga qadar aynan shu jamoa safida to‘p tepgan. Uchrashuv Joan Gamper kubogi doirasida o‘tkazilib, "ko‘k-anorranglilar"ning 2:1 hisobidagi g‘alabasi bilan yakunlandi.
Abdelkarim Flikning yosh futbolchilarga bo‘lgan munosabati unga katta ishonch bag‘ishlayotganini ta’kidladi.
"Flik men bilan xuddi meni asosiy hujumchi sifatida ko‘rayotgandek gaplashadi. Buning o‘zi menga juda katta ishonch beradi. Uning barcha yosh futbolchilarga yondashuvi shunday", — deya Abdelkarimning so‘zlarini keltirdi Barca Universal.
"Barselona" bu yozda iste’dodli misrlik futbolchining transfer huquqlarini "Al-Ahli"dan to‘liq sotib oldi. O‘tgan mavsumning ikkinchi yarmida esa Abdelkarim kataloniyaliklar safida ijara asosida harakat qilib, jamoaning ikkinchi tarkibida tajriba to‘plagan edi.
