"Барселона" ҳужумчиси Ҳамза Абделкарим бош мураббий Ҳанс-Дитер Флик билан ишлаш ҳақида фикр билдирди.
18 ёшли футболчи чоршанба куни ўзи учун қадрдон бўлган Қоҳиранинг "Ал-Аҳли" клуби дарвозасини ишғол қилди. Абдулкарим Европа сари йўл олгунига қадар айнан шу жамоа сафида тўп тепган. Учрашув Жоан Гампер кубоги доирасида ўтказилиб, "кўк-анорранглилар"нинг 2:1 ҳисобидаги ғалабаси билан якунланди.
Абделькарим Фликнинг ёш футболчиларга бўлган муносабати унга катта ишонч бағишлаётганини таъкидлади.
"Флик мен билан худди мени асосий ҳужумчи сифатида кўраётгандек гаплашади. Бунинг ўзи менга жуда катта ишонч беради. Унинг барча ёш футболчиларга ёндашуви шундай", — дея Абделкаримнинг сўзларини келтирди Barca Universal.
"Барселона" бу ёзда истеъдодли мисрлик футболчининг трансфер ҳуқуқларини "Ал-Аҳли"дан тўлиқ сотиб олди. Ўтган мавсумнинг иккинчи ярмида эса Абделькарим каталонияликлар сафида ижара асосида ҳаракат қилиб, жамоанинг иккинчи таркибида тажриба тўплаган эди.
