Madridning "Atletiko" klubi La Ligadagi yangi mavsumni "Malaga" ustidan 2:0 hisobidagi g‘alaba bilan boshladi. Birinchi tur uchrashuvida Li Kan In 70-daqiqada, Aleks Baena esa 85-daqiqada gol urdi.

Hujumchi Xulian Alvares jarohati sabab o‘yinni o‘tkazib yubordi. Biroq ayrim muxlislar uning klubni tark etish istagini unutmagan edi. Uchrashuv oxirida "Metropolitano" stadioni tribunalaridan birida argentinalik futbolchi sha’niga haqoratli hayqiriqlar yangradi. Stadiondagi muxlislarning asosiy qismi esa bunga qo‘shilmadi.

Jurnalistlar "Atletiko" bosh murabbiyi Diyego Simeonedan bu holatga munosabat bildirishni so‘rashdi.

"Bunday kechada bu savolni berishga to‘g‘ri kelayotgani achinarli, ammo bugun tribunalardan birida Xulian Alvaresga nisbatan haqoratli hayqiriqlar bo‘ldi. Bu haqda fikringizni bilmoqchimiz", — dedi jurnalist.

"Men muxlislarimizni hurmat qilaman", — deb javob berdi Simeone matbuot anjumanida.

Eslatib o‘tamiz, yoz davomida Alvaresning "Barselona"ga o‘tishi mumkinligi haqida xabarlar tarqaldi. Biroq "Atletiko" muzokara o‘tkazishdan bosh tortmoqda, futbolchining o‘zi esa klubdan ketish istagini ochiq bildirgan.