«Liverpul» yarim himoyachisi Aleksis Mak Allister «Manchester Siti»ning transfer qiziqishlari doirasiga tushdi.

Insayder Ben Jeykobs ma’lumotiga ko‘ra, «shaharliklar» rahbariyati 27 yoshli argentinalik futbolchining imkoniyatlarini yuqori baholamoqda va uni markaziy chiziqni kuchaytirish uchun nomzodlardan biri sifatida ko‘rib chiqmoqda.

Avvalroq Mak Allister nomzodi «Manchester Siti» ichida muhokama qilingani xabar qilingandi. Biroq hozircha klublar o‘rtasida hech qanday aloqa yoki aniq muzokaralar bo‘lmagan. Shu bois, hozirgi bosqichda gap faqat ehtimoliy nomzod haqida ketmoqda.

Shu bilan birga, «Liverpul» o‘z yarim himoyachisi bilan xayrlashish niyatida emas. Mak Allisterning otasi Karlos ham o‘g‘lining bu transfer oynasida mersisaydliklar safida qolishini ta’kidlagan.

Makallister 2023 yil yozidan buyon «Liverpul» sharafini himoya qilib kelmoqda. Uning klub bilan amaldagi shartnomasi 2028 yilga qadar mo‘ljallangan.