«Kristal Pelas» «Oser»ning 22 yoshli yarim himoyachisi Keven Danua transferi bo‘yicha Fransiya klubiga murojaat qildi. Bu haqda insayder Fabrisio Romano xabar berdi.

Ayni paytda London klubi futbolchining ehtimoliy transferi yuzasidan «Oser» bilan muzokara olib bormoqda.

Manba ma’lumotiga ko‘ra, «Kristal Pelas» Danua uchun 25 million funt hamda bonuslarni o‘z ichiga olgan kelishuvni muhokama qilishga tayyor.

Danua «Oser» tarbiyalanuvchisi hisoblanadi. Uning Fransiya klubi bilan amaldagi shartnomasi 2029 yilga qadar mo‘ljallangan. Futbolchi Fransiya yoshlar terma jamoalarida ham to‘p tepib kelmoqda.

O‘tgan mavsumda fransuz yarim himoyachisi barcha musobaqalar doirasida 34 ta uchrashuvda maydonga tushib, 3 ta gol urdi va 1 ta golli uzatmani amalga oshirdi.