«Liverpul» yarim himoyachisi Kyortis Jons faoliyatini «Inter»da davom ettirishga yaqin. 25 yoshli angliyalik futbolchi transferni yakunlash uchun Milanga yetib bordi.

So‘nggi ma’lumotlarga ko‘ra, «Liverpul» va «Inter» transfer bo‘yicha kelishuvga erishgan. Milanliklar 30 million yevro kafolatlangan mablag‘ to‘laydi, yana 5 million yevro bonuslar ko‘rinishida berilishi mumkin.

Jons endi tibbiy ko‘rikdan o‘tishi va shundan so‘ng «Inter» bilan shartnoma imzolashi kutilmoqda.

Futbolchi «Liverpul» tizimida 16 yil faoliyat yuritdi — u klub akademiyasiga 9 yoshida qo‘shilgan. Jonsning amaldagi shartnomasi tugashiga bir yil qolgan va yangi kelishuv bo‘yicha muzokaralarda siljish bo‘lmagani uni sotish qaroriga ta’sir ko‘rsatgan.

Jonsning ketishidan so‘ng «Liverpul» uning o‘rniga yangi yarim himoyachi xarid qiladimi yoki mavjud tarkib bilan mavsumni davom ettiradimi, hozircha aniq emas.