Italiyaning "Ravenna" klubi Ronaldinyo uchun taqdimot o‘tkazdi. Unda 6000 ga yaqin odam ishtirok etdi.

46 yoshli braziliyalik sobiq futbolchi mamlakatning uchinchi eng kuchli divizioni bo‘lgan S Seriya klubi ulushini sotib oldi. Shuningdek, u mavsumdagi o‘yinlardan birida maydonga tushishi kutilmoqda.

Ronaldinyo payshanba kuni muxlislarga tanishtirildi. "Ravenna" prezidenti Ignasio Chipriani afsonaning transferi shaharni klub atrofida birlashtirish va yangi mavsumga ko‘proq qiziqish uyg‘otish uchun mo‘ljallanganini aytdi.

Braziliyalik sobiq futbolchining o‘zi maydonga qaytishi mumkinligi haqida so‘ralganda, ikkilanib qoldi.

"Agar bu amalga oshsa, yanada chiroyli bo‘ladi. Bilmadim, bu prezident va murabbiyga bog‘liq. Men bu yerga do‘stligimiz tufayli keldim. Jamoa qanday o‘ynashini ko‘ramiz. Men yordam berish uchun keldim", dedi Ronaldinyo.

Braziliyalik futbolchining so‘nggi rasmiy o‘yini 2015 yilda "Fluminense" bilan bo‘lgan.