Италиянинг "Равенна" клуби Роналдиньо учун тақдимот ўтказди. Унда 6000 га яқин одам иштирок этди.
46 ёшли бразилиялик собиқ футболчи мамлакатнинг учинчи энг кучли дивизиони бўлган С Серия клуби улушини сотиб олди. Шунингдек, у мавсумдаги ўйинлардан бирида майдонга тушиши кутилмоқда.
Роналдиньо пайшанба куни мухлисларга таништирилди. "Равенна" президенти Игнацио Чиприани афсонанинг трансфери шаҳарни клуб атрофида бирлаштириш ва янги мавсумга кўпроқ қизиқиш уйғотиш учун мўлжалланганини айтди.
Бразилиялик собиқ футболчининг ўзи майдонга қайтиши мумкинлиги ҳақида сўралганда, иккиланиб қолди.
"Агар бу амалга ошса, янада чиройли бўлади. Билмадим, бу президент ва мураббийга боғлиқ. Мен бу ерга дўстлигимиз туфайли келдим. Жамоа қандай ўйнашини кўрамиз. Мен ёрдам бериш учун келдим", деди Роналдиньо.
Бразилиялик футболчининг сўнгги расмий ўйини 2015 йилда "Флуминенсе" билан бўлган.
