Ukrainalik vinger Mixail Mudrikning faoliyatini boshqa klubda ijara asosida davom ettirishi yuqori ehtimolga ega. Insayder Fabrisio Romanoning ma’lumotlariga ko‘ra, 25 yoshli futbolchining londonlik klubdan ijaraga ketishi deyarli kafolatlangan.

Romano «Lids» klubining Mudrikka bo‘lgan qiziqishini ham tasdiqladi. «Chelsi» ingliz klubining birinchi taklifini rad etgan, ammo muzokaralar davom etishi mumkin.

Shuningdek, londonliklar o‘zlari bilan egalari umumiy bo‘lgan «Strasburg» klubiga ijaraga berish variantini ham ko‘rib chiqishga tayyor. Biroq futbolchining o‘zi faoliyatini Angliya Premyer-ligasida davom ettirishni va APLda qolishni afzal ko‘radi.

Diskvalifikasiyasi bekor qilinganidan keyin ukrainalik futbolchi «Chelsi» safida uchta o‘rtoqlik uchrashuvida maydonga tushib, «Yuventus», «Milan» va «Darul Tazim» jamoalariga qarshi bahslarda jami 39 daqiqa harakat qildi.

Avvalroq 2026/2027 yilgi mavsumda APLda ishtirok etayotgan «Koventri» klubi ham Mudrikka qiziqish bildirayotgani xabar qilingan edi.