Germaniya Kubogi doirasidagi “Valdhof” va “Kayzerslautern” jamoalari o‘rtasidagi uchrashuvdan (0:1) so‘ng futbolchilar o‘rtasida janjal yuzaga keldi va unda 85 kishi jarohatlandi.

Janjal vaqtida jamoalar muxlislari bir-birlariga turli buyumlar, jumladan, pirotexnika vositalarini ota boshladi. Natijada muxlislar maydonga tushib ketdi. Polisiya ma’lumotiga ko‘ra, 35 nafar xodim yengil jarohat olgan. Uchrashuv xavfsizligini ta’minlash uchun 1400 ga yaqin xavfsizlik xodimi jalb etilgan.

“Polisiya tartibsizlik ishtirokchilarini tribunalar tomon siqib chiqara oldi. Stadionda otliq polisiya bo‘linmasi ham joylashtirildi. 35 nafar huquq-tartibot xodimi mash’alalar sabab yengil jarohat oldi. Umuman olganda, 85 kishi tibbiy yordamga muhtoj bo‘lgan. Bir nechta muxlis qo‘lga olindi”, deyiladi xabarda.

Qayd etilishicha, polisiya haqorat qilish, hujum va mulkka zarar yetkazish kabi turli huquqbuzarliklar bo‘yicha tergov ishlarini boshlagan.

Uchrashuv Manhaym shahridagi “Karl-Benz” stadionida bo‘lib o‘tgan va uni 23,5 mingga yaqin tomoshabin kuzatgan. Ularning qariyb 3500 nafari mehmon jamoa muxlislari bo‘lgan.

Bahs davomida stadiondagi muhit keskin bo‘lib, tribunalarda pirotexnika vositalari bir necha bor yoqilgan.

Vaziyat 90 daqiqa davomida gol urilmaganidan so‘ng yanada keskinlashgan. Maydonda futbolchilar o‘rtasida to‘qnashuv yuz bergach, “Kayzerslautern”ning ayrim muxlislari o‘tirish joylari tomon mushakbozlik vositalarini otgan. Bunga javoban manhaymlik ishqibozlar ommaviy ravishda maydonga yugurib chiqa boshlagan.