Германия Кубоги доирасидаги “Валдҳоф” ва “Кайзерслаутерн” жамоалари ўртасидаги учрашувдан (0:1) сўнг футболчилар ўртасида жанжал юзага келди ва унда 85 киши жароҳатланди.

Жанжал вақтида жамоалар мухлислари бир-бирларига турли буюмлар, жумладан, пиротехника воситаларини ота бошлади. Натижада мухлислар майдонга тушиб кетди. Полиция маълумотига кўра, 35 нафар ходим енгил жароҳат олган. Учрашув хавфсизлигини таъминлаш учун 1400 га яқин хавфсизлик ходими жалб этилган.

“Полиция тартибсизлик иштирокчиларини трибуналар томон сиқиб чиқара олди. Стадионда отлиқ полиция бўлинмаси ҳам жойлаштирилди. 35 нафар ҳуқуқ-тартибот ходими машъалалар сабаб енгил жароҳат олди. Умуман олганда, 85 киши тиббий ёрдамга муҳтож бўлган. Бир нечта мухлис қўлга олинди”, дейилади хабарда.

Қайд этилишича, полиция ҳақорат қилиш, ҳужум ва мулкка зарар етказиш каби турли ҳуқуқбузарликлар бўйича тергов ишларини бошлаган.

Учрашув Манҳайм шаҳридаги “Карл-Бенз” стадионида бўлиб ўтган ва уни 23,5 мингга яқин томошабин кузатган. Уларнинг қарийб 3500 нафари меҳмон жамоа мухлислари бўлган.

Баҳс давомида стадиондаги муҳит кескин бўлиб, трибуналарда пиротехника воситалари бир неча бор ёқилган.

Вазият 90 дақиқа давомида гол урилмаганидан сўнг янада кескинлашган. Майдонда футболчилар ўртасида тўқнашув юз бергач, “Кайзерслаутерн”нинг айрим мухлислари ўтириш жойлари томон мушакбозлик воситаларини отган. Бунга жавобан манҳаймлик ишқибозлар оммавий равишда майдонга югуриб чиқа бошлаган.