Frankfurtning «Ayntraxt» klubi «Frayburg» darvozaboni Noa Atubolu transferi bo‘yicha kelishuvga erishdi. Bu haqda Sky Sport Germany jurnalisti Florian Plettenberg xabar berdi.

Manba ma’lumotiga ko‘ra, 24 yoshli germaniyalik futbolchi ayni paytda yangi klubida tibbiy ko‘rikdan o‘tmoqda.

Atubolu «burgutlar» safiga ijara asosida qo‘shiladi. Kelishuvda uning transfer huquqini 13 million yevroga majburiy sotib olish sharti ham ko‘zda tutilgan.

Avvalroq darvozabonning «Marsel»ga o‘tishi mumkinligi xabar qilingandi, ammo bu transfer amalga oshmay qolgan.

Atubolu «Frayburg» tarbiyalanuvchisi hisoblanadi va klubning asosiy jamoasida 2022/23 yilgi mavsumda debyut qilgan. U o‘tgan mavsumda 50 ta uchrashuvda maydonga tushib, 70 ta gol o‘tkazib yuborgan va 12 ta o‘yinda darvozasi daxlsizligini saqlab qolgan.

Darvozabonning «Frayburg» bilan amaldagi shartnomasi 2027 yil yoziga qadar mo‘ljallangan. Biroq Florian Plettenberg va kicker nashri ma’lumotiga ko‘ra, Atubolu ijaraga ketishi uchun klub bilan shartnomasini qayta imzolagan.

Transfermarkt portali futbolchining bozor qiymatini 25 million yevroga baholamoqda. Germaniya yoshlar terma jamoasining sobiq darvozaboni «Frayburg» asosiy jamoasi safida jami 125 ta o‘yin o‘tkazib, 182 ta gol o‘tkazib yuborgan va 38 ta uchrashuvda «quruq» o‘yin qayd etgan.