Франкфуртнинг «Айнтрахт» клуби «Фрайбург» дарвозабони Ноа Атуболу трансфери бўйича келишувга эришди. Бу ҳақда Sky Sport Germany журналисти Флориан Плеттенберг хабар берди.

Манба маълумотига кўра, 24 ёшли германиялик футболчи айни пайтда янги клубида тиббий кўрикдан ўтмоқда.

Атуболу «бургутлар» сафига ижара асосида қўшилади. Келишувда унинг трансфер ҳуқуқини 13 миллион еврога мажбурий сотиб олиш шарти ҳам кўзда тутилган.

Аввалроқ дарвозабоннинг «Марсель»га ўтиши мумкинлиги хабар қилинганди, аммо бу трансфер амалга ошмай қолган.

Атуболу «Фрайбург» тарбияланувчиси ҳисобланади ва клубнинг асосий жамоасида 2022/23 йилги мавсумда дебют қилган. У ўтган мавсумда 50 та учрашувда майдонга тушиб, 70 та гол ўтказиб юборган ва 12 та ўйинда дарвозаси дахлсизлигини сақлаб қолган.

Дарвозабоннинг «Фрайбург» билан амалдаги шартномаси 2027 йил ёзига қадар мўлжалланган. Бироқ Флориан Плеттенберг ва kicker нашри маълумотига кўра, Атуболу ижарага кетиши учун клуб билан шартномасини қайта имзолаган.

Transfermarkt портали футболчининг бозор қийматини 25 миллион еврога баҳоламоқда. Германия ёшлар терма жамоасининг собиқ дарвозабони «Фрайбург» асосий жамоаси сафида жами 125 та ўйин ўтказиб, 182 та гол ўтказиб юборган ва 38 та учрашувда «қуруқ» ўйин қайд этган.