"Реал" ҳужумчиси Килиан Мбаппе Англия Премьер-лигасининг қайси клубига ўтиши мумкин бўлганини айтиб берди.

"Онам учун энг маъқул вариант "Ливерпуль" эди. У менинг айнан шу клубда ўйнашимни истарди. Бу қизиқ воқеа, чунки бу ҳақиқат. "Монако"да ўйнаб юрган пайтимда бир қарор қабул қилишим керак эди. Мен "Ливерпуль"га ўтишга жуда яқин бўлганман, чунки онам Юрген Клопп бошқарувидаги "Ливерпуль"нинг катта мухлиси эди. У ажойиб мураббий. Мен у билан учрашганман, муносабатларимиз жуда яхши ва мен уни жуда ҳурмат қиламан.

Эсимда, биз самолётда айланиб учардик ва у менга ўз лойиҳаси ҳақида гапириб берарди. Мен эса унга: "Мени бошқа ишонтиришингиз шарт эмас. Ахир сиз Юрген Клоппсиз, "Ливерпуль" эса буюк клуб", дегандим.

Охир-оқибат онамнинг гапига қулоқ солмадим. Мен Парижга қайтишни, Францияда ўйнашни истардим. Ўша пайтда мамлакатни тарк этиш ниятим йўқ эди", деди Мбаппе The Touchline'га.

Ўтган ёзда Юрген Клопп ҳам Килиан Мбаппе билан олиб борилган музокаралар ҳақида сўзлаб берган эди.