Umarali Rahmonaliyev «Sabah»ning tarixiy muvaffaqiyatida muhim rol o‘ynadi. O‘zbekistonlik futbolchi hal qiluvchi uchrashuvda gol urib, jamoasining Chempionlar ligasi asosiy bosqichiga ilk bor yo‘l olishiga hissa qo‘shdi.

Rahmonaliyev 74-daqiqada raqib darvozasini ishg‘ol qilib, «Sabah»ga bahsni qo‘shimcha bo‘limlarga olib o‘tish imkonini berdi. Keyinchalik Ozarbayjon jamoasi uchrashuvni 5:2 hisobida o‘z foydasiga hal qildi va klub tarixida birinchi marta musobaqaning asosiy bosqichiga chiqdi.

O‘yindan keyin esa o‘zbekistonlik yarimhimoyachi yana bir jihati bilan mahalliy muxlislar e’tiborini tortdi. U jurnalistlar savollariga ozarbayjon tilida javob berdi.

Ijtimoiy tarmoqlarda futbolchining Bokuga kelganidan keyin qisqa vaqt ichida tilni o‘zlashtirgani keng muhokama qilinmoqda. Ayrim muxlislar bu holatga hazil aralash munosabat bildirib, «U ozarbayjon tilini atigi bir yilda o‘rgandi. Ko‘rinishidan, hech qayerga ketmoqchi emas», deya yozmoqda.

Muxlislarning munosabatidan ko‘rinib turibdiki, ular Rahmonaliyevning «Sabah» safida qolishini mamnuniyat bilan qabul qiladi.