Умарали Раҳмоналиев «Сабаҳ»нинг тарихий муваффақиятида муҳим роль ўйнади. Ўзбекистонлик футболчи ҳал қилувчи учрашувда гол уриб, жамоасининг Чемпионлар лигаси асосий босқичига илк бор йўл олишига ҳисса қўшди.

Раҳмоналиев 74-дақиқада рақиб дарвозасини ишғол қилиб, «Сабаҳ»га баҳсни қўшимча бўлимларга олиб ўтиш имконини берди. Кейинчалик Озарбайжон жамоаси учрашувни 5:2 ҳисобида ўз фойдасига ҳал қилди ва клуб тарихида биринчи марта мусобақанинг асосий босқичига чиқди.

Ўйиндан кейин эса ўзбекистонлик яримҳимоячи яна бир жиҳати билан маҳаллий мухлислар эътиборини тортди. У журналистлар саволларига озарбайжон тилида жавоб берди.

Ижтимоий тармоқларда футболчининг Бокуга келганидан кейин қисқа вақт ичида тилни ўзлаштиргани кенг муҳокама қилинмоқда. Айрим мухлислар бу ҳолатга ҳазил аралаш муносабат билдириб, «У озарбайжон тилини атиги бир йилда ўрганди. Кўринишидан, ҳеч қаерга кетмоқчи эмас», дея ёзмоқда.

Мухлисларнинг муносабатидан кўриниб турибдики, улар Раҳмоналиевнинг «Сабаҳ» сафида қолишини мамнуният билан қабул қилади.